सदरमुकाम धादिङबेसीवाट जिल्लाको उत्तरी भेग तर्फ चल्ने सवारी साधनले स्थानीयवाट असुल्ने गरेको भाडा महंगो भएको हुने गरेको हो । मार्पाक गाविसको लपाङदेखि पन्तटारसम्मको सडक दुरी  मुस्किलले एक किलोमिटर पनि छैन तर यातायात व्यवसायीहरुले ३५ रुपैयाँ भाडा लिँदै आएको सर्वसाधारणको गुनासो छ । यस रुटमा चल्ने सवारी साधनले धादिङबेसीबाट लपाङसम्मको ३ सय ५० रुपैयाँ र पन्तटारसम्मको ३ सय ८५ रुपैयाँ लिनेगरि आधिकारिक रुपमै भाडा तय गरेको जिल्लाको उत्तरी भेगमा सञ्चालन हुने सवारीको व्यवसायिक संस्था संयुक्त यातायात व्यवसायी संघले जनाएको छ ।     भाडा अत्याधिक लिएको भन्दा भाडा घटाउन माग गरि स्थानीयबासीले पटक पटक विरोध गर्दै आएपनि सर्वसाधरणको गुनासो सुन्ने निकाय नभएका कारण उपभोक्ताहरु मर्कामा पर्दै आईरहेका छन । सदरमुकामबाट तिप्लिङ सडकमा यातायात संचालन गर्नका लागि संयुक्त यातायात समिति, निजि गाडी र केही ट्रक समेत गरि ८० ओटाभन्दा बढी गाडीहरु संचालनमा रहेको वताईएको छ । 
    समितिले टिकटनै काटेर धादिङबेसीवाट ३२ किलोमिटर दुरी  रहेको किन्ताङफेदीका लागि ३ सय ५० रुपैयाँ र ३६ किलोमिटर रहेको दार्खाफेदीका लागि ३ सय ८५ रुपैयाँ भाडा निर्धारण गरि यात्रुसंग असुल्दै आएको छ । १४ जनाको सिट क्षमता भएको सो क्षेत्रमा संचालन हुने जीपमा २८ जना यात्रु राखेर जोखिमपूर्ण यात्रा गर्दै आएको स्थानीय शिक्षक केशरीप्रसाद पन्त बताउंछन ।